අවසන් තරඟයේ හයේ පහරවල් වැස්සක් කල තරංග කුසලානය ගනිද්දී හැමෝම සංවේදී කරමින් පිටියේදීම කල දේ.

නායක උපුල් තරංගගේ අතිවිශිෂ්ඨ ඉනිම හේතුවෙන් ශ්‍රී ලංකා ක්‍රිකට් ආයතනය සංවිධානය කළ අන්තර් පළාත් තරගාවලියේ ශූරතාවය හිමි කර ගැනීමට කොළඹ කණ්ඩායම සමත් විය. තරගාවලිය ආරම්භ වූ පළමු තරගයේදීත් අතිවිශිෂ්ඨ ශතකයක් රැස් කළ උපුල්, තරගාවලිය පුරා දස්කම් පාමින් සිය කණ්ඩායම අවසන් වටයට ගෙන ඒමට සමත් විය. අවසානයේ අවසන් මහා තරගයේදීත් ශතකයක් රැස් කළ උපුල්, ශ්‍රී ලංකාවේ විශිෂ්ඨතම සීමීත ඕවර පිතිකරුවා තමන් බව නැවතත් පසක් කරමින් සිය කණ්ඩායමට ජය ගෙන ආවේය.

කොළඹ කණ්ඩායමේ නායක දිනේෂ් චන්දිමාල් ආබාධයක් හේතුවෙන් අවසන් මහා තරගයට ක්‍රීඩා නොකළ නිසා කණ්ඩායමේ නායකත්ව වගකීම මෙන්ම කඩුල්ල පසුපස වගකීමද උපුල් තරංගට හිමි විය. ඒ සියලුම වගකීම් ඉතා හොදින් ඉටු කරමින් ඔහු කණ්ඩායමට ජය මාවත විවෘත කළේය.ආර්.ප්‍රේමදාස ක්‍රීඩාංගණයේදී පැවැති අවසන් මහා තරගයේදී දඹුල්ල කණ්ඩායම කඩුලු 7 කින් පරාජයට පත්කරමින් කොළඹ කණ්ඩායම මෙලෙසින් ජයග්‍රහණය වාර්තා කළේය. කාසියේ වාසිය දිනා පළමුව පන්දුවට පහරදුන් දඹුල්ල කණ්ඩායමට රැස් කිරීමට හැකි වූයේ ඕවර 20 අවසානයේ කඩුලු 8 ක් දැවී ලකුණු 163 ක් පමණි.

ජයග්‍රහණය සඳහා ලකුණු 164 ක ඉලක්කයක් හඹාගිය කොළඹ කණ්ඩායම ඕවර 18.2 කදී කඩුලු 3 ක් පමණක් දැවී ඉලක්කය පහසුවෙන් පසු කිරීමට සමත්විය. කොළඹ කණ්ඩායම වෙනුවෙන් තීරණාත්මක ඉනිම ක්‍රීඩා කළ උපුල් තරංග මෙම තරගාවලියේ දෙවැනි ශතකය පන්දු 53 කදී ලබාගැනීමට සමත්විය.

ඉනිම නිමාවනතෙක් කඩුල්ලේ රැඳී සිටිමින් කොළඹ කණ්ඩායම ජයග්‍රහණය කරා රැගෙන ගිය උපුල් තරංග පන්දු 55 කදී හයේ පහර 9 ක් සහ හතරේ පහර 6 ක් සමගින් ලකුණු 104 ක් රැස්කළ අතර මෙම තරගාවලියේ වැඩිම ලකුණුලාභියා බවට පත්වූයේ ලකුණු 414ක් රැස් කරමිනි.තරගාවලියේ දක්ෂම පිතිකරුවා සහ අවසන් තරගයේ දක්ෂතම ක්‍රීඩකයාට හිමි සම්මාන ද්විත්වය හිමිකර ගැනීමට උපුල් තරංග සමත් විය.

මේ අතර ජයග්‍රාහී කුසලානය ලබා ගනිද්දි උපුල් තරංග විසින් කොළඹ කණ්ඩායමේ මුල් තරග සදහා නායකත්වය දුන් දිනේෂ් චන්දිමාල්ටද වේදිකාවට ආරාධනා කිරීම සංවේදි ක්‍රියාවක් විය. එය උපුල් තරංගගේ නිහතමානි ගුණය විදහාපාන්නක් බවට සමාජජාලාවන්හී ක්‍රිකට් රසිකයන් අදහස් දක්වා තිබුනි. කොළඹ කණ්ඩායමේ නායකත්වය දැරූ චන්දිමාල්, උපුල් දෙදෙනාම ගාල්ල අම්බලන්ගොඩ ප්‍රදේශයෙන් බිහිවූ ක්‍රීඩකයන් වීම විශේෂත්වයකි.

උපුටා ගැනීම nethgossip.lk

Leave a Reply

Your email address will not be published. Required fields are marked *